ស្រុកព្រៃនប់– ថ្ងៃទី ២១ ខែមេសា ឆ្នាំ ២០២៥៖ អាជ្ញាធរកំពុងស៊ើបអង្កេតករណីគ្រោះថ្នាក់ចរាចរណ៍ដ៏រន្ធត់មួយបានកើតឡើងនៅលើផ្លូវរថភ្លើងលេខ ២០៩+៦៨០ ស្ថិតក្នុងភូមិទួល ឃុំទឹកល្អក់ ស្រុកព្រៃនប់ ខេត្តព្រះសីហនុ។ ហេតុការណ៍នេះ ត្រូវបានប្រជាពលរដ្ឋរាយការណ៍មកសមត្ថកិច្ច នៅវេលាម៉ោង៧និង០០នាទីព្រឹក ដោយប្រជាពលរដ្ឋប្រទះឃើញសាកសពបុរសម្នាក់ដេកលើផ្លូវរថភ្លើង ខណៈកំពុងដើរទៅធ្វើការ។
សាក្សីដែលឃើញហេតុការណ៍បានឱ្យដឹងថា មានបុរសដែលមិនស្គាល់អត្តសញ្ញាណ និងមានសតិមិនប្រក្រតីបានដើរដោយពុំមានទិសដៅ លុះមកដល់ចំណុចខាងលើបានដេកលើផ្លូវដែក គួរឲ្យសោកស្ដាយដែររថភ្លើងដែលមិនត្រូវបានស្គាល់អត្តសញ្ញាណធ្វើដំណើរពីក្រុងព្រះសីហនុ ឆ្ពោះទៅកំពត បានបើកកិនជើងបុរសនោះបាក់ជើងស្តាំ។ ក្រោយកើតហេតុ រថភ្លើងបានបន្តដំណើរឆ្ពោះទៅខេត្តកំពត ចំណែកឯអ្នកថ្មើរជើងនោះមិនត្រូវបានស្គាល់អត្តសញ្ញាណទេ។
ក្រោយទទួលបានរបាយការណ៍ភ្លាម នគរបាលប៉ុស្តិ៍មូលដ្ឋានបានរាយការណ៍ទៅកម្លាំងចរាចរណ៍ និងសណ្ដាប់ធ្នាប់សាធារណៈភ្លាមៗដើម្បីចុះពិនិត្យស្ថានភាព។ លទ្ធផលបឋមបង្ហាញថា បុរសដែលមានសតិមិនគ្រប់ខាងលើនោះ អាចស្លាប់តាំងពីយប់មកម្ល៉េះ ក្រោយពេលរទះភ្លើនកិន។
ក្រោយពេលកើតហេតុ សមត្ថកិច្ចមូលដ្ឋានបានចុះទៅពិនិត្យសាកសពនៅកន្លែងកើតហេតុ រង់ចាំសាច់ញាតិមកទទួលយកទៅធ្វើបុណ្យតាមប្រពៃណី។ ការស៊ើបអង្កេតកំពុងបន្ត ខណៈសមត្ថកិច្ចកំពុងស្វែងរកព័ត៌មានលម្អិតបន្ថែមអំពីឧប្បត្តិហេតុនេះ និងជូនដំណឹងដល់ក្រុមគ្រួសារជនរងគ្រោះ៕
